سياسة الخصوصية

بهاي الصفحة بنشرح شو البيانات اللي بنجمعها، وليش، ومين بيعالجها معنا، وشو حقوقك.

1. شو بنجمع

• بيانات الحساب: الإيميل، والاسم والصورة إذا دخلت بحساب Google.
• النصوص اللي بتكتبها، والفيديوهات اللي بتنعمل منها.
• التسجيلات الصوتية: بتنرفع لتخزين Fal.ai عشان تتحول لنص بس، وما بنحفظها عندنا.
• الأوصاف اللي بترفضها بوابة المحتوى: نص الوصف، وسبب الرفض، ووقته، عشان نطبّق حدود المخالفات المشروحة بسياسة الاستخدام المقبول.
• سجل النقاط والمشتريات (الباقة، المبلغ، التاريخ). بيانات البطاقة ما بتوصلنا أبداً، مزوّد الدفع هو اللي بيعالجها.
• بيانات تقنية لمنع التحايل وحماية الخدمة: عنوان الشبكة (IP)، ورقم مخفي بيتحط بمتصفحك (بصمة الجهاز)، ونوع المتصفح. عنوان الشبكة وبصمة الجهاز بينحفظوا مشفّرين بطريقة ما بترجع للأصل.

2. ليش بنستخدمها

• عشان نشغّل الخدمة: تسجيل الدخول، توليد الفيديو، حفظ فيديوهاتك، حساب النقاط وإرجاعها عند الفشل.
• عشان نفحص الوصف قبل التوليد: كل وصف بيمر بشكل آلي على فلتر كلمات وعلى نموذج ذكاء اصطناعي بيصنّفه، وبعدها على فلتر المزوّد.
• عشان نمنع التحايل (زي فتح حسابات كثيرة للمجاني) ونحمي المنصة، ونطبّق حد الفيديو المجاني لكل جهاز وشبكة.
• عشان نتواصل معك بخصوص حسابك أو مشترياتك. ما بنبعتلك رسائل تسويقية بدون موافقتك.

3. مين بيعالج البيانات معنا

• Supabase (قاعدة البيانات وتسجيل الدخول، بالاتحاد الأوروبي)، Cloudflare (الاستضافة وتخزين الفيديوهات وفحص "إنت مش روبوت")، Fal.ai (توليد الفيديو وتحويل الصوت لنص وتحسين الوصف وفحص المحتوى بالذكاء الاصطناعي)، Google (إذا اخترت الدخول بحساب Google)، ومزوّد الدفع (الدفع والفواتير).
• ما بنبيع بياناتك لأي حدا.

4. قديش بنحتفظ فيها

• بنحتفظ ببياناتك طول ما حسابك موجود. لما تحذف حسابك، بنمسح بياناتك الشخصية وفيديوهاتك.
• سجلات المشتريات والنقاط المالية بتضل محفوظة بدون اسمك ولا إيميلك، لأنه القانون والمحاسبة بيطلبوها.
• بنحتفظ ببصمة مشفّرة (hash) لإيميلك إذا استخدمت الفيديو المجاني، عشان نمنع إعادة التسجيل للحصول على مجاني ثاني. البصمة ما بترجع للإيميل الأصلي.
• سجل الأوصاف المرفوضة بيضل طول ما الحساب موجود. لما تحذف حسابك بنمسح نصوصها، وبيضل عددها وتاريخها بدون نص.
• بصمات الجهاز والشبكة المشفّرة بتضل مع سجلات الفيديو حتى بعد حذف الحساب، عشان ما ينعطى فيديو مجاني ثاني لنفس الجهاز. ما بتدل على اسمك ولا إيميلك.

5. حقوقك

• بتقدر تشوف بياناتك بصفحة "حسابي"، وتحذف أي فيديو، وتحذف حسابك كامل بأي وقت.
• إذا بدك نسخة من بياناتك أو عندك أي سؤال: support@sawwerha.com

6. الكوكيز

بنستخدم كوكيز ضرورية بس: لتسجيل الدخول، ولتذكّر لغة الواجهة وحالة القائمة الجانبية، وكوكي فيه رقم الجهاز المخفي لمنع التحايل على الفيديو المجاني. وفحص Cloudflare "إنت مش روبوت" ممكن يستخدم معلومات تقنية من متصفحك. ما بنستخدم كوكيز إعلانية.